Croeso i’r nawfed o’n Wythnnosau Celf Ynys Môn, sydd bellach wedi’i sefydlu’i hun yn gadarn yng nghalendr Môn fel y digwyddiad celfyddydau mwyaf cynhwysfawr ar yr Ynys.

Y llynedd fe gawsom ni 15,000 o ymwelwyr i’r digwyddiad. Eleni, yn ystod yr Wythnosau Stiwdios ac Orielau Agored, bydd 52 o baentwyr, cerflunwyr, ffotograffwyr, gwneuthurwyr printiau, artistiaid gosod a chrefftwyr yn agor eu stiwdios i ymwelwyr. Bydd pob mathau o bethau ar gael i chi eu prynu, yn gardiau, printiau a gweithiau celf gwreiddiol; a gallwch weld gweithiau sydd wrthi’n cael eu gwneud ac arddangosfeydd o gelfyddyd gyfoes. Mae’r lleoliadau’n cynnwys stiwdios, capeli, ysguboriau, siediau, orielau a chartrefi artistiaid. Byddwch yn cael cyfle i gyfarfod a siarad â’r artist, yn aml dros baned o de, a thrwy hynny gipolwg unigryw o’r broses artistig. Peidiwch â theimlo’n swil ynghylch ymweld; yr unig reswm y mae’r holl artistiaid yn agor eu stiwdios yw eu bod yn awyddus i’ch cyfarfod chi. Os nad oes gennych chi drafnidiaeth neu os hoffech gael cwmni wrth ymweld, yna ystyriwch fanteisio ar ein teithiau bws tywysedig am ddim. Mae gwybodaeth bellach am y rhain yn yr adran Digwyddiadau.

Mae’r digwyddiad yn ymestyn dros ddwy wythnos lawn y Pasg gyda rhai artistiaid yn agored yr holl amser ac eraill am ychydig ddyddiau’n unig. Mae llawlyfr lliw 44 tudalen wedi cael ei ddosbarthu’n helaeth, a gellir lawrlwytho copi PDF ynghyd ag ychwanegiadau a chywiriadau oddiyma. Yn y llawlyfr, ochr yn ochr â manylion pob artist, mae calendr sy’n nodi eu dyddiau agor, ac yn adran gefn y llawlyfr, mae amserlen ddyddiol o’r holl stiwdios sy’n agored ar bob diwrnod sy’n eich galluogi chi i gynllunio taith i ymweld â’r rhai sy’n agored. Yn arferol rydym yn brin o arian ac mae’n golygu cryn ymdrech i godi digon o gyllid i gynnal y digwyddiad, felly rydym yn hynod o ddiolchgar i’n cyllidwyr eleni: Cyngor Celfyddydau Cymru, Cyngor Sir Fôn, Llywodraeth Cymru a Chronfa Amaethyddol Ewrop ar gyfer Datblygu Gwledig sydd wedi’n galluogi ni i wneud llawer mwy i hyrwyddo a rhedeg y digwyddiad.

Os byddwch chi’n mwynhau eich ymweliad yna dewch yn ôl yn yr hydref i ddarganfod y doniau celfyddydau perfformio ar yr Ynys, neu ymunwch fel unigolyn neu grŵp â’r digwyddiad. Dangosir rhagflas o Wythnosau Celfyddydau Perfformio Ynys Môn, 19 Hydref – 4 Tachwedd 2012 o dan yr adran Wythnosau Celfyddydau Perfformio. Am gopi o’r llawlyfr, neu os oes gennych chi unrhyw gwestiynau, cysylltwch â: Heather yng Nghanolfan Ucheldre 01407 763361, neu he@ucheldre.org.